Quelea Birds | గుప్పెడంత కూడా ఉండని బుల్లి పిట్టలపై కెన్యా దేశం పగబట్టింది. ఎర్రటి ముక్కుతో ముద్దు ముద్దుగా కనిపించే పక్షుల్ని నిర్దాక్షిణ్యంగా చంపేందుకు కంకణం కట్టుకుంది. పది, ఇరవై కాదు ఏకంగా ఆరు లక్షల బుల్లి పిట్టలను చంపేయాలని కెన్యా ప్రభుత్వం ఆదేశాలు జారీ చేసింది. చూడగానే అబ్బుర పరిచే వేలడంత పక్షుల్ని చంపాలన్న కఠిన నిర్ణయానికి ఎందుకొచ్చింది. వాటిపై కెన్యాకు ఎందుకంత పగ? అని అనుకుంటున్నారా?
నిజానికి అది ఆ బుల్లి పిట్టలపై కోపం కాదు.. భయం.. ఆఫ్రికా దేశమైన కెన్యాలో ఒకప్పుడు కరవు తాండవించింది. పంటలు పండకపోవడంతో ఆహారం దొరక్క ఎన్నో కష్టాలు పడ్డారు. ఆ దారుణ పరిస్థితుల నుంచి ఇప్పుడిప్పుడే కోలుకుంటున్నారు. పంటలు కూడా పండుతున్నాయి. ఇలాంటి సమయంలో క్యులియా అనే చిన్న సైజు పక్షులు క్యూబా దేశాన్ని గడగడలాడిస్తున్నాయి. చూడ్డానికి 5 అంగుళాలు కూడా ఉండని ఈ పక్షులు భయాందోళనకు గురిచేస్తున్నాయి.
కెన్యాలో గోధుమ, బార్లీ, బియ్యం, పొద్దుతిరుగుడు పంటలను ఎక్కువగా పండిస్తున్నారు. ఈ పంటలు చేతికొచ్చే సమయంలో క్యులియా పక్షులు వాటిపై వాలి నాశనం చేస్తున్నాయి. పంట గింజలను తినేస్తున్నాయి. దీనివల్ల వందలాది టన్నుల ఆహారం ధాన్యం నాశనమైపోతుంది. దీనిపై అటు రైతులు, ఇటు ప్రభుత్వం ఆందోళన చెందుతుంది. ఇదే కొనసాగితే ఆహార ధాన్యాల కొరతతో మళ్లీ కరవును ఎదుర్కోవాల్సి వస్తుందేమోనని భయపడిపోతున్నారు. అందుకే లక్షల సంఖ్యలో ఉన్న క్యులియా పక్షులపై కెన్యా యుద్ధం ప్రకటించింది. వెంటనే ఆరు లక్షల పక్షులను చంపేయాలని నిర్ణయం తీసుకుంది
Follow Us : Google News, Facebook, Twitter
